لو أنت مرتبك 1000 فى الشهر تعرف تعيش بيهم فى مصر
بس مش عاوز حد يدعى عليه
عندك عيش بلدى 1 جنية فى اليوم X الشهر 30 جنية
بس لازم تلحق دورك فى طابور الفرن وتلحق شغلك فى نفس الوقت ربنا معاك
اللبن 1 لتر ب4 جنية عند البيدق ويارب ميطلعش بودرة سيراميك ويكفى العيال مش عارف عند النمس يطلع بكام المهم X الشهر 120 جنية
الفول كيلو فول اسبوعيا يعنى 125 جرام يوميا رضا والحمد لله 8 جنية X الشهر 32 جنية
جبنة بيضاءكيلو في الأسبوع 125 جرام يوميا انت عايش20 جنية X الشهر 80 جنية
بيض عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة 5جنية حد أدنى X الشهر 20 جنية
خضارعبارة عن صنف واحد بس + كيلو طماطم + لمونه وحزمة جرجير اسبوعيا10 جنية X الشهر40جنية
فواكهه لازم طبعا عبارة عن كيلو برتقال أو قشر موز مرة اسبوعيا علشان العيال تفتكر اسمة5 جنية X الشهر 20جنية
شاى لزوم الكيف اللى بيذل والضيوف الرزلين 10جنية أنا ما بدخلش بيتى البيبسى والكوكاكولا دول يهود يا عم
سكرعدد واحد كيلو اسبوعيا لو ما كفاش أخد من السكر اللى فيه 4جنية X الشهر16جنية
ارزعدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام4جنية X الشهر 16 جنية
زيت لتر اسبوعيا علشان تشرب بق على الريق 10جنية X الشهر 40جنية
مكرونه عبارة عن عدد 4 كيس 400 جرام اسبوعيا 0000 خلى العيال تنبسط 8جنية X الشهر 32جنية
عدد واحد دجاجة اسبوعيا للعائله اظن معقول خوفا على العائله من انفلونزه الطيور 20جنية X الشهر 80جنية
لحمه عدد واحد كيلو لحم اسبوعيا لزوم صنف الخضار واللمونه وحزمة الجرجير الف هنا 30جنية X الشهر 120جنية
بقوليات عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا ) 10جنية
توابل عبارة عن دقيق + ملح + كمون + فلفل + كسبرة + وممكن تديها خل براحتك 10جنية
صابون عبارة عن صابونه واحدة للحمام + صابون مواعين + مسحوق للملابس ( النظافة عموما ) 15 جنية
مواصلات اهو بركب نص الطريق والنص التانى بمشيه 2 جنية X الشهر 60جنية
حلاق عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا ) 10جنية
مدرسة عبارة عن مصروفات المدرسة + مصروف العيال اليومى + كراسات واقلام وجلادألخ 10جنية X الشهر 40جنية
دكتور نمرض بالدور طبعا عدد اربع افراد مرة واحدة للفرد كل 4 اشهر 30جنية دكتور على نياته أنا اروح الكشف وودى الواد الاستشاره
ادوية أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه 50 جنية تامين صحى
تليفون اشتراك الهيئة هنرد بس ومش هنتكلم يفيد بايه كلام 10جنية
مياة للاسف لازم نشرب 10جنية
غاز الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية 5جنية
نور لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع 20جنية
قمامة اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين 10جنية
بواب مهو من حقه يعيش هو كمان لو عشر شقق يبقى 150 جنية شهريا خليه يهيس 15جنية
صيانة لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ 30جنية
ملابس عبارة عن الصيفى والشتوى داخلى وخارجى واحذية وشربت وكلونات واتصرف بقى 100جنية
الاجمالى
1081 جنية
اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض
ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة
عيد الام ربنا يخليها ويديها الصحه 0 جنية " أديها بومبه "
عيد الكحك مضر وملهوش لزمة 0جنية
عيد اللحمة مضر وملهوش لزمة 0جنية
حلاوة المولد السكر مضر وملهوش لزمة 0جنية
كل سنة وانتم طيبين
ورمضان كريم وخيره كتير
أخ خ خ نسيت احسب زكاة الفطر بس مش عارف هدفع ولا هأخد ؟
عموما هقولكم على قائمة الممنوعات والمحظورات 000 متقربوش منها علشان تعرفو تتنيلو وتكملو الشهر
ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين ( الجبنه البيضا )
المعلبات تونه بلوبيف لانشون سالمون فول وطبعا البسطرمة والزيتون والمخللات
ممنوع
اوعى قلبك يحن لعيل من العيال وتجيبله شيبسى ولا ببسى أو كراتيه ونايتى عسلية بسكوت شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل
احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى
ومتنساش ان البانية والفليه من الممنوعات ومتقربش ومتمشيش فى الشارع جنبك كنتاكى وهاردييز وهاربيز وتكه ومؤمن وكوك دور واياك من السندوتشات عموما زى الطعمية والبطاطس والبذنجان الحجات الحلوة دى مش مطلوبه تعملك حموضه وهتحتاج فوار واحنا منعناه مع الدوا وطبعا مش محتاج اقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ
خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها يالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد
اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم
طبيعى انك مش هتقرب من الفواكهة خالص البرقوق المنجو البطيخ الفراوله الكيوى الخوخ العنب التفاح حتى الكاكا والحرنكش والنبأ والقصب والدوم والتوت ممنوع سيادتك
وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطو
السبت يونيو 27, 2009 4:45 pm
