أهــــــــــــــــلا بيــــــــــكــــــــــــــــم
النهاردة حصلت حاجه كوميدى خالص
SOHILA الشهيرة بـــــــــــــ ( SOSO ) إشترت 2 كيلو برتقال أبو صرة علشان عندها شوية برد ولما وصلت بيهم لباب العمارة أفتكرت أنها نسيت تشترى نص كيلو لبن عشان القطة بتاعتها .
وكان واقف قدام باب العمارة على الرصيف التاني 3 من اعضاء المنتدى .
الآول : ( H_A_N_E_E_N ) اللى كانت واقفة بتسمع فى الــــ mb3 أغنية ريمكس .
الثانى : ( TOOT_ANK_AMOON) اللى كان واقف يشترى cd لآصالة .
الثالث : ( MARWA ) اللى كانت بتشرب عصير قصب فى المحل اللى قدام العمارة .
فسابت ( SOHILA ) كيس البرتقال جمب باب العمارة ورجعت علشان تشترى اللبن ولما أشترت اللبن ورجعت ملقتش كيس البرتقال .
ولما سألت التلاته إذا كان حد فيهم شاف كيس البرتقال بتاع ( SOHILA ) قالوا ...........
( H_A_N_E_E_N ) : أف ..بجد حاجه موش ممكن كيس برتقال ايه وبتاع ايه ..يعنى ينفع كده تخرجيني من المود بتاع الاغنية ..بجد حاجه لا تطاق ..ال برتقال ال .
( TOOT_ANK_AMOON ) : هع هع.. برتقال ايه اللى انت جاى تقولى عليه وواجعه دماغنا علشان شوية 2 كيلو برتقال أبو صرة .. لو لاقيتيه هاتى واحدة.. هع هع.
( MARWA ) : لا انا مشفتش اى أكياس برتقال خالص انا واقفة بشرب العصير حتى لسه مخلصتهوش .. تاخدى شوية .
SOHILA
مش عرفت مين اللى سرق كيس البرتقال
بس أنا عرفت
لو أنت كمان عرفت
أتصل على الرقم دة
زيرو أربع أصفار صفرين
وأبقى قابلنى لو كسبت حاااااااااااجة
خلصنا هزار بقى مع أصحابى اللى فى المنتدى وأنا بعزهم جدا جدا وعلشان كده حبيت اهزر معاهم وفى نفس الوقت نفكر شوية فى حكاية ( أتصل الآن ) ويمكن تكسب مش عارف أيه والدقيقة بجنيه ونص من اى موبايل ورقصنى على واحدة ونص لو جنابك كسبت .
وفى شكل جديد وإستيل حلو وإعلان لذيذ زى إعلانات المفتش ( كرومبو) اللى عملنا نموذج منها طريقة جديدة ومبتكرة لتشطيب جيوب سعادتك من رصيدك ، يمكن فكرة الاتصال موش جديدة لكن فكرة الاعلان جديدة مما دفع كتير من السذج للإتصال ظنا منهم انهم عباقرة خلاص ووصلوا إلى الجاني وهو نفسه لا يدرى انه حياخد على- لامؤاخذه- قفاه .
وعلشان العملية تبقى محبوكة يقولك مع بداية كل حلقة جديدة الفائز فى الحلقة اللى فاتت فلان الفلاني من المنطقة الفلانية ولا انت عارف اصلا إذا كان الكلام ده حقيقى ولا لأ ..هو موش جايز ميكنش اصلا فيه حد بيفوز بحاجه وكله بس سحب من رصيد جنابك .. طب على فرض وخلينا ناس زى الفل نيتهم بيضاء زى فانلة الزمالك وفرضنا إن واحد فاز طب الاختيار ده بيتم على أساس ايه أو زى العالم اللى بتطلع فى التليفزيون ما بيقولوا( أليات الاختيار) ..
يعنى هم مثلا يقعدوا اسبوع يلموا فى مكالمات وفى الاخر ياخدوا أى نمرة وخلاص بدون اى أليات للأختيار .. أيوه المفتش كرمبو لذيذ وبن حلال واعلان اشطه وانا بحبه لكن معنديش استعداد اخسر أى قرش فى عملية أنا واثقة 100% أنها فى الهوى شاشى .
هى المشكلة اللعب على حته الاحتياج عند الناس الغلابة ، وعلشان كده تلاقى كتيره اوي برامج اتصل وإكسب زى برنامج من دول على إحدى القنوات نسبنا من العيال الخنافس اللى بتطلع فى البرنامج ده ونركز فى شوية البنات اللى فيه اللى عاملين فيها مذيعات وواقفين يترقصوا على الاغاني والطبلة ، وواحدة منهم بتطلع بلبس اقل حاجه تتقال عليه انه (فاضح ) وفكرة البرنامج يحطلك شوية حروف تختار منها إجابة السؤال اللى هما بيحطوه وشوف السؤال الروعة ده ( حاجه فى أوضه النوم ؟؟) والناس تتصل اللى يقول مخدة واللى يقول مرتبه واللى يقول دولاب وتقريبا ألوف المكالمات فصصت كل حته فى اوضة النوم ومسبتش اى حاجه وطبعا كلها إجابات غلط لتأتي الاجابة بعد ساعتين او اكتر من البرنامج وهى ( الرسيفر) مع ان اساسا مفيش علاقة بين الرسيفر وأوضة النوم وموش شرط ونادرا ما بيتحط فيها ولا هو يعتبر قطعة من اوضة النوم لكن العملية كلها استغلال للمتفرج اللى طمع انه يكسب اوضة نوم لو جاوب صح ، والعيب موش فى القنوات دي ولا فى البرامج دي لكن العيب فى اللى بيمسك موبيله ويقول ( الووووووو ممكن اشترك معاكم) .
ومش تنسوا بقى تقولولى مين اللى أخد البرتقال
وأبقوا قابلونى فى الحلقة اللى جاية
مع تمنيااااتى لكـــــــــــــــم بشرب المقالب